Në vigjilje të konferencës ndërkombëtare të Këshilli për Akreditimin e Arsimit të Lartë të Shteteve të Bashkuara (CHEA), që po mbahet në Uashington, drejtori i përgjithshëm i Agjencisë së Kosovës për Akreditim, Naim Gashi, ka takuar zëvendëspresidenten e CHEA-së, Michelle Claville, me të cilën kanë biseduar për anëtarësim e AKA-së në CHEA, fillimisht si anëtare dhe nisjen e procesit për të plotësuar kriteret për t’u njohur akreditimet e Kosovës edhe në Shtetet e Bashkuara.

Përmes një njoftimi për medie të AKA-së bëhet e ditur se zëvendëspresidentja për Kërkime dhe Analizë të Politikave, Claville, ka thënë se AKA është e mirëpritur si anëtare e CHEA dhe ka ofruar bashkëpunimin e plotë që të plotësohen kriteret për tu bërë “akreditues i njohur” nga kjo organizatë.

Nga ana e tij, drejtori Gashi ka thënë se me Ligjin për AKA-në, në Kosovë validohen të gjitha akreditimet nga institucionet e akredituara nga CHEA. Ai ka thënë se në sistemin e arsimit të lartë kemi institucione nga Shtetet e Bashkuara, që e bëjnë edhe më të nevojshme që AKA të njihet dhe të bëhet anëtare e CHEA.

Në takim ka marrë pjesë edhe profesori Olgun Çiçek, anëtar i Këshillit Ndërkombëtar të CHEA dhe njëherësh ekspert ndërkombëtar i akreditimit në AKA-së. Profesori Çiçek ka ofruar gatishmërinë që me përvojën e tij të përkrahë AKA-në në plotësimin e kritereve të CHEA.

Ndryshe, CHEA është një organizatë në nivel federal në Shtetet e Bashkuara që njeh agjencitë akredituese të arsimit të lartë, homologe e Asociacionit Evropian për Sigurimin e Cilësisë në Arsimin e Lartë (ENQA) në Evropë.

“AKA ka interesim që të bëhet “akreditues i njohur” nga CHEA sepse kjo ndikon drejtpërdrejt në internacionalizimin dhe në imazhin e sistemit të arsimit të lartë në Kosovë dhe njohjen e diplomave të Kosovë në SHBA, qoftë për vazhdim të studimeve ose për çështje të punësimit. Nëpërmes këtij anëtarësimi, AKA do të bëhet pjesë e një rrjeti të gjerë të institucioneve ndërkombëtare të arsimit të lartë, për përmirësimin e cilësisë në arsim, për të pasur qasje në informacione, raporte dhe udhëzues për standardet dhe praktikat më të mira në akreditim dhe sigurimin e cilësisë”, thuhet në fund të njoftimit.