Ministrja në detyrë e Integrimeve Evropiane, Mimoza Ahmetaj ka thënë se Kosova është afër nënshkrimit të marrëveshjes për liberalizimin e vizave me BE-në.

Këtë deklaratë Ahmetaj e bëri gjatë hapjes së shkollës verore të BE-së me fokus në çështjet e BE-së, zbatimin e MSA-së dhe marrëdhëniet Kosovë-BE, shkruan arbresh.info.

Ajo tha se kjo shkollë është shumë e rëndësishme dhe se  integrimi i të rinjëve është çështje motivuese në agjendën e Qeverisë së Kosovës.

“Pavarësisht prapavijës politike, fetare apo edhe të tjera është përgjegjësi e Qeverisë sonë që të mbështesim të rinjtë. Në nëntë vitet pas pavarësisë, ne kemi nënshkruar marrëveshjen e Stabilizim- Asociimit dhe jemi afër për të nënshkruar marrëveshjen për liberalizim  të vizave. Ky është një process që kërkon vëmendje të madhe”, u shpreh Ahmetaj.

Duke folur rreth marrëveshjes së MSA-së, ajo tha se kjo marrëveshje krijon mundësi të mëdha për kompanitë kosovare pasi që ua mundëson atyre të fusin mallrat në tregun evropian pa tarifa./Arbresh.info.