Asociacioni i Gazetarëve të Kosovës ka pranuar në disa raste, dhe sidomos në ditët e fundit, shqetësimin e pjesëtarëve të komuniteteve rom, ashkali dhe egjiptian rreth përdorimit të termit RAE në media dhe sferën publike, transmeton arbresh.info.

Në reagimin e AGK-së thuhet se termi RAE duhet të mos përdoret në raportimet e mediave.

“Pjesëtarë të këtyre tri komuniteteve, duke përfshirë gazetarë dhe punëtorë të tjerë medialë, pjesë e organizatës sonë, ndjehen të ofenduar për përdorimin e termit që i redukton ata në një komunitet të vetëm. Ky është një sentiment që ne e ndajmë me ta, dhe ju kërkojmë mirësisht që edhe duke respektuar Kodin e Medieve të Shkruara dhe Kodin e Etikës për Ofruesit e Shërbimeve Mediale, të mos e përdorni këtë term në raportimet tuaja”, thuhet në njoftimin për media.

Për më tepër, besojmë se mund të luani rol për të edukuar audiencën për konotacionin negativ që një term i tillë përbën për këta qytetarë të Republikës së Kosovës./arbresh.info/