Kryetari i Lidhjes Demokratike të Kosovës (LDK), Lumir Abdixhiku me familjen e  ngushtë të Enver Malokut në përvjetorin e vrasjes së tij kanë vendosur një pllakatë me portretin e tij në selinë qendrore të partisë.

Me anë të një postimi në Facebook, Abdixhiku ka thënë se në ditën e vrasjes së Malokut është ndërprerë rrugëtimi i një gazetari vetëmohues, shkruan Arbresh.info.

“25 vjet më parë, në mbrëmjen e 11 janarit të vitit të lirisë, Enver Maloku u qëllua pranë banesës së tij në Breg të Diellit në Prishtinë.  Atë ditë u ndërpre rrugëtimi i një gazetari vetëmohues, i një ëndrrimtari të lirisë, i një intelektuali të rrallë e të pashoq, i një adhuruesi të shkrimit, rokut, e vet shpirtit kulturor të shoqërisë sonë. Patrioti model i orëve më të rënda e bartësi i dritares informuese në lëvizjen më të madhe nacionale për liri, pavarësi e demokraci, u vra në moshën 45 vjeçare.”, u shpreh ai.

Abdixhiku tha se portreti I vendosur në Murin e Nderit në Selinë Qendrore të LDK-së, do të qëndrojnë si shenja të rënda që ekojnë përherë dhe në përditshmëri.

“Sot, një çerek shekulli pas, me familjen e ngushtë Maloku, me zonjën Hava, Doruntinën e Drinin, në Selinë Qendrore të LDK-së shpalosëm pllakën e portretin përkujtimor të tij. Ky portret e kjo pllakë, e vendosur në Murin e Nderit, do të na qëndrojnë si shenja të rënda që na ekojnë përherë dhe në përditshmëri. Që na rikujtojnë rreshtin e gjatë të patriotëve të Lidhjes dhe vet Republikës, ëndrra fillestare e të cilëve na është bërë udhërrëfimi ynë sot.”, përfundoi ai./Arbresh.info/