Kryetari i Lidhjes Demokratike të Kosovës (LDK), Lumir Abdixhiku në 26 vjetorin e Epopesë së UÇK-së, ka përkujtuar sakrificën sublime të Familjes Jashari.

Abdixhiku tha se datat 5, 6 dhe 7 mars të vitit 1998 shënojnë ngjarjen më kulminante në luftën e Kosovës për liri e çlirim, shkruan Arbresh.info.

“Datat 5, 6 dhe 7 mars të vitit 1998 shënojnë ngjarjen më kulminante në luftën e Kosovës për liri e çlirim; sakrificën sublime të Familjes Jashari e me këtë dhe fillimin e fundit të përpjekjes sonë shekullore për liri.”, u shpreh Abdixhiku.

“Flijimi i familjes Jashari në altarin e lirisë, ishte sakrificë ultime e gdhendur në mendjen e mësuesit Shaban Jasharit, të Komandantit legjendar Adem Jashari e të Hamëz Jasharit. Ata zgjodhëm lirinë prandaj dhe morrën përjetësinë.”, shtoi ai.

Më tej, Abdixhiku u shpreh se rënia heroike e tyre, përballë forcave ushtarake e paraushtarake të Serbisë, ishte kushtrim për një popull të tërë.

“Ishte këmbanë për luftën dhe përpjekjen tonë kolektive drejt lirisë, e për aleancat e ardhshme që do të rreshtoheshin me idealin e tyre e tonin pa dallim.”, shtoi mes të tjerash kreu i LDK-së.

Ndër të tjera, kreu opozitar u shpreh se është obligim i secilit prej nesh që të punojmë fort sepse vetëm kështu, siç tha ai, i nderojmë dhe e dërgojmë në vend amanetin e të rënëve të Familjes Jashari dhe gjithë të rënëve për lirinë e Kosovës.

“Lavdi e përjetshme për Familjen Jashari!”, përfundoi ai./Arbresh.info/