Kreu i LDK-së, Lumir Abdixhiku e ka nisur ditën duke vizituar një familje pesë anëtarëshe.

Abdixhiku përmes një shkrimi na “Facebook”, njoftoi se teksa piu kafen e mëngjesit me ta, familjarët ndanë hallet e tyre për krizën aktuale ekonomike në vend, shkruan arbresh.info

Nga vizita te familja Thaçi, i pari i LDK-së ka premtuar rritjen e koeficientit në 125.

“Kafen e mëngjesit këtë të premte e piva me familjen e mrekullueshme të Lulzim e Nesibe Thaqi. Si prindër të tre fëmijëve e në pritje të të katërtit, burim të vetëm të të hyrave kanë pagat që marrin nga sektori publik. Si punonjës shëndetësorë, punë të vetme kanë kujdesin për tjetrin. Janë adresa e parë e secilit me hall. Shteti, ndërsa, punë të vetme duhej ta kishte kujdesin për ta.

Pagat e tyre sot vlejnë 50% më pak, se sa para dy viteve; derisa koeficienti i Qeverisë nuk mbulon as për së afërmi inflacionin rekord që ka goditur familje si kjo. Realiteti i hidhur është se, historia e tyre nuk është e vetme. Kjo histori përballjeje ndahet nga familje të panumërta anembanë Kosovës.

Propozimi ynë për koeficient 125 lehtëson përballueshmërinë e familjeve si kjo. Propozimi ynë për heqje të TVSH-së në produkte bazë – bukë, miell, vaj, sheqer, qumësht e vezë – do të bënte jetën e tyre shumë më të lehtë” shkruan Abdixhiku në njoftim./arbresh.info/