Kryetari i LDK-së, Lumir Abdixhiku, ka reaguar pas vendimit për pezullimin e dialogut strategjik mes Kosovës dhe Shteteve të Bashkuara të Amerikës, duke e cilësuar këtë si pikën më të ulët të marrëdhënieve me aleatin tonë strategjik dhe ekzistencial.

‘Suspendimi i dialogut strategjik me SHBA-të paraqet pikën më të ulët të relacioneve të Kosovës me aleatin tonë strategjik dhe ekzistencial; si shtet i pavarur e sovran. Shkatërruesit e shtetit, bllokuesit historik, shkelësit e Kushtetutës, ligjeve e normave morale njerëzore, kanë zgjedhur të ndërtojnë rrugëtimin e tyre mbi krizën e përhershme, mbi frikën e pashtershme dhe mbi fatkeqësinë e Republikës”, tha ai.

Sipas tij, ky është rezultat i një qeverisjeje që vepron në kundërshtim me interesat shtetërore dhe normat demokratike.

“Është koha të bashkohemi të gjithë; t’i japim fund kësaj çmendurie politike dhe të ndërtojmë shtetin që e kemi merituar gjithmonë – para se të bëhet vonë për të gjithë. LDK do të kujdestarojë me plot përkushtim e përgjegjësi rrugën euroatlantike të Kosovës; do të garantojë miqësinë e përhershme me SHBA-në dhe do të rikthejë vendin tonë në binarët e arsyes, ligjit dhe demokracisë”, pohoi ai./Arbresh.info