Lidhja Demokratike e Kosovës e ka vazhduar fushatën zgjedhore në Artanë. Lideri i këtij subjekti, Lumir Abdixhiku prezantoi kandidatin e LDK-së për kryetar të kësaj komune, Bajrush Ymerin, duke e cilësuar atë si njeriun e duhur për Artanën.

“Bajrush Ymeri është biri i këtij vendi, që e njeh më mirë se kushdo çdo lagje, çdo rrugë, çdo fshat. Ai nuk vjen me premtime boshe, por me përvojë, përkushtim e ndershmëri. Ai është gati të punojë ditë e natë për qytetarët, për t’ua dhënë dinjitetin dhe për ta bërë Artanën vend të zhvillimit”, tha Abdixhiku.

Kryetari i LDK-së shtoi se përveç kryetarit, një komunë e fortë ka nevojë edhe për një asamble të fortë, duke prezantuar edhe listën e kandidatëve për Kuvendin Komunal.

“Janë burra e gra të ndershëm, profesionistë që e shohin politikën si shërbim e jo si privilegj”, u shpreh ai, duke falënderuar qytetarët për mbështetjen dhe duke u bërë thirrje për fitore më 12 tetor.