Kryetari i Lidhjes Demokratike të Kosovës, Lumir Abdixhiku me anë të një postimi në rrjetin social Facebook, ka kërkuar nga qeveria që të dalin në krye të përgjegjësisë , pasiqë sipas tij situata me COVID-19 në Kosovës është jashtë kontrollit.

Abdixhiku poashtu ka thënë se qeveria aktuale duhet të sillet si shtet.

Kryetari i LDK-së në postimin e tij në Facebook ka dhënë disa rekomandime të ekspertëve  të shëndetësisë:

1. Të shtohen ditët e vaksinimit në shtatë; vikendeve s’mund të pushohet më. Në këtë gjendje alarmante pushimi i shtetit është i pakuptimtë.
2. Të hapen qendrat mobile të vaksinimit nëpër secilën komunë nëpër Kosovë. Të shpërndahen vaksinat tek qytetarët tanë e të thjeshtohet i gjithë procesi vaksinues.
3. Të shtrëngohen masat për të pavaksinuarit e të lehtësohen për secilin tjetër që përfundon këtë proces të domosdoshëm e jetik.
4. Të rritet numri i stafit shëndetësor në Kosovë; në mënyrë që të ndihmohen kapacitetet e ngarkuara që i kemi sot.
5. Të vendosen të gjithë inspektorët në terren, të mbahet rregull në secilin vend. Rregullat e vendosura në letër e pa mbikqyrje mbesin vetëm fjalë.
6. Të jepen shtesat financiare për stafin aktual; të ndahet menjëherë buxhet dinjitoz dhe jo lëmoshë! Stafi shëndetësorë ka nevojë; janë të dërrmuar me mbi 18 muaj angazhim.
7. Të shtohen shtretërit për të hospitalizuar qytetarët tanë; Klinika Infektive është mbi çdo kapacitet normal.
8. Qeveria të merret vetëm me pandemi dhe me urgjencë. Të tregojë lidership e të shpëtojë jetë”, ka shkruar Abdixhiku në llogarinë e tij në Facebook. /arbresh.info/