Kryetari i Lidhjes Demokratike të Kosovës, Isa Mustafa, ka thënë se çështja e presidentit duhet të zgjidhet pa shkuar në zgjedhje. Për këtë ai edhe ka dhënë një propozim që të organizohet një tryezë politike, raporton Arbresh.info.

“Nuk kemi biseduar për presidentin akoma me partitë. Mendojmë që në javën tjetër të ulemi të organizojmë një tryezë të përbashkët me partitë politike dhe të bëjmë përpjekje që ta gjejmë një zgjidhje që sipas opinionit tonë është më mirë të gjendjet tani sesa të shkojmë në zgjedhje” ishte deklarata e Mustafës.

Nga Lëvizja Vetëvendosje për Arbresh.info kanë thënë se vetëm zgjedhjet i pranojnë si opsion.

“Nuk ka unitet pa legjitimitet. Për legjitimitet duhet rikthyer tek qytetarët përmes zgjedhjeve demokratike”, ka deklaruar zyra për media e LVV-së.

Nënkryetari i Partisë Demokratike të Kosovës, Shaqir Totaj u shpreh për Arbresh.info, se për çështjen e Presidentit  duhet të diskutohet dhe se e sheh si ide të mirë propozimin e Isa Mustafës.

“Është ide interesante e cila vlen të merret ne shqyrtim seriozisht, sepse mënyra ma e mirë  për ti zgjedhur çështjet kontestuese është përmes bisedimeve. Por për ketë duhet te ketë edhe ftese zyrtare dhe jo vetëm deklarim përmes mediave”, Totaj.