Kryeministri i vendit, Albin Kurti tha se për tre vjet luftë, ukrainasit dhe Ukraina rezistuan duke dhënë një shembull të lartë se si një popull dhe shteti i tij, organizohet dhe lufton për mbrojtjen e atdheut, lirisë dhe pavarësisë.

Me anë të një postimi në Facebook, ai përmedni ndihmat e Qeverisë së Kosovës ndaj Ukrainës për këto tre vjet, shkruan Arbresh.info.

“Republika e Kosovës u është bashkuar në sanksione dhe veprime të tjera Shteteve të Bashkuara të Amerikës dhe shteteve të tjera aleate perëndimore, në dënimin e agresionit rus dhe në mbështetje të rezistencës së Ukrainës për mbrojtjen e pavarësisë së saj. Si Qeveri e Kosovës i kemi vendosur sanksione Federatës së Rusisë që të nesërmen e fillimit të luftës, më 25 shkurt 2022, ndërkaq më 16 maj 2022, u kemi vendosur sanksione të tjera Rusisë dhe Bjellorusisë. Më 4 korrik 2022 dhe pastaj më 22 mars 2023, Kosova u është bashkuar pakove të sanksioneve ndaj Rusisë, të miratuara nga Shtetet e Bashkuara të Amerikës dhe Bashkimi Evropian. Më 20 gusht 2023, Kosova i është bashkuar Deklaratës së Përbashkët të Vendeve të G7 mbi Mbështetjen për Ukrainën, e cila u miratua si mbështetje për Ukrainën në të drejtën e saj për mbrojtjen e institucioneve dhe të pavarësisë së saj.”, tha ai.

“Në përpjekje për t’i kontribuar mbështetjes së shtetit dhe popullit ukrainas, Qeveria e Kosovës përkrahu edhe programin Gazetarët në Rezidencë (JiR program), që zbatohet nga Asociacioni i Gazetarëve të Kosovës, për strehimin e gazetarëve ukrainas që janë zhvendosur nga Ukraina si rezultat i luftës e të cilët i mirëprita sot në kryeministri, për t’i falënderuar për punën që po e bëjnë, kontributin që po e japin dhe qëndresën që po e shfaqin. Republika e Kosovës gjithashtu është shtet anëtar i Grupit të Kontaktit për Mbrojtjen e Ukrainës të udhëhequr nga Shtetet e Bashkuara të Amerikës, në takimet e të cilit marrin pjesë ministri i Mbrojtjes i Kosovës dhe Komandanti i Forcës së Sigurisë së Kosovës. Ushtarët tanë të Forcës së Sigurisë së Kosovës, bashkë me Forcat e Armatosura Britanike, i kanë trajnuar trupat ushtarake ukrainase në kuadër të operacionit “Interflex”. Në vitin e kaluar, 2024, Kosova i ka dërguar dy pako ushtarake si mbështetje ushtrisë ukrainase, në luftën e saj ndaj trupave okupatore ruse.”, shtoi Kurti.

Ai tha se do të duhen vite të gjata punë për llogaritjen e viktimave dhe dëmeve, si dhe për rimëkëmbjen e jetës së shoqërisë së Ukrainës.

“Në tre vjetorin e luftës, jemi me shpresë për vendosmëri e drejtësi, për paqe dhe liri!”, përfundoi ai./Arbresh.info/