Prokuroria në Pejë pohon se zjarri në spitalin e Pejës duket të ketë qenë i qëllimshëm. Këtë e bazon në disa pamje që i ka siguruar e ku shihet një person i maskuar. I njëjti është në ndjekje, por nuk ka arritur të arrestohet ende.

Spitali i Përgjithshëm i Pejës, gjatë javës së kaluar, është përballur me një zjarr që për pasojë la vetëm disa dëme materiale.

Në fillim u mendua se zjarri u shkaktua si pasojë e ndonjë defekti të energjisë elektrike, por hetuesia tregoi që gjithçka mund të ketë qenë e qëllimshme.

Zëdhënësi i prokurorisë në Pejë, Shkodran Nikqi, thotë se rasti ka të bëjë me një person që ka qenë mjaft mirë i maskuar. Por, ai thekson se janë marrë masat e duhura për ta identifikuar dhe për ta arrestuar.

“Zjarrëvënia ka qenë e qëllimshme dhe për ketë çështje janë duke u marrë veprime intensive hetimore nga policia e Kosovës në mënyrë që ky person I cili dyshohet që ka bo zjarrëvënien të identifikohet dhe më pas të arrestohet “, tha Shkodran Nikqi, zëdhënësi i prokurorisë në Pejë.

Edhe Spitali i Pejës, përmes një njoftimi, tha se zjarri është shkaktuar qëllimshëm nga një person i maskuar, mirëpo për shkak të mosndërhyrjes në punën e hetuesisë, nuk e kanë publikuar më herët këtë informacion.

Në ambientet, ku ka shpërthyer zjarri, gjendet edhe arkiv i spitalit me dokumente që nga themelimi i spitalit.