Google ADS

Bislimi thotë se dialogu përballet me refuzimet e shpeshta nga Serbia

18:50 | 22 Maj 2024
E.G

Përfaqësues nga Shoqata për Evropën Juglindore në Mynih (Southeast Europe Associaton), e cila është e bazuar në Mynih, po qëndrojnë në vendin tonë në një vizitë studimore, në kuadër të së cilës u mirëpritën në takim nga zëvendëskryeministri i parë për Integrim Evropian, Zhvillim dhe Dialog i Republikës së Kosovës, Besnik Bislimi.

Në fjalën e tij hyrëse dhe bashkëbisedimin e zhvilluar me anëtarë të kësaj shoqate, zëvendëskryeministri Bislimi i njoftoi ata mbi situatën aktuale në vend dhe të arriturat e sukseset e vendit tonë përgjatë tri viteve të fundit të qeverisjes, shkruan Arbresh.info.

Duke prezantuar tri shtyllat e integrimit evropian, zhvillimit ekonomik dhe dialogut, ai theksoi se objektiv i rëndësishëm ka qenë avancimi në rrugëtimin drejt integrimit evropian, ku tashmë është finalizuar procesi i liberalizimit të vizave dhe kemi bërë hapa tutje në zbatimin e agjendës së reformave evropiane dhe arritjen e standardeve evropiane, të cilat u bënë shkas më tej dhe për aplikimin për anëtarësim në dhjetor të vitit 2022.

“Mbi zhvillimin ekonomik u theksua progresi që ka njohur vendi ynë dhe disa prej indikatorëve makroekonomikë, si përmes rritjes ekonomike, rritjes së punësimit, rritjes së eksporteve dhe investimeve të huaja direkte, si dhe vëmendjen e kushtuar ndaj përkujdesjes për gjithëpërfshirje e shpërndarje të barabartë tek të gjithë qytetarët, e veçanërisht përkrahjes së grave dhe të rinjve, si kryeqendër e forcë shtytëse ndër më kryesoret në zhvillimin e vendit tonë.”, thuhet në njoftim.

Ndër të tjera, u përmendën edhe raportet e indekset ndërkombëtare, të cilat dëshmojnë mbi nivelin e progresit që ka njohur Kosova në tri vitet e fundit në sundim të ligjit, luftim të korrupsionit, zhvillim ekonomik, liritë dhe të drejtat e demokratizimi.

Sa i përket dialogut me Serbinë, Bislimi theksoi se Kosova mbetet palë konstruktive dhe e përkushtuar, por procesi po përballet me refuzimet e shpeshta të palës tjetër për avancim tutje në shumë çështje e posaçërisht shkeljet e njëpasnjëshme dhe mungesës së zbatimit të marrëveshjeve të arritura.

Bislimi i falënderoi pjesëmarrësit për vizitën e tyre në Kosovë dhe për bashkëbisedimin, duke i uruar dhe vijim të mbarë e të frytshëm të qëndrimit të tyre në vendin tonë./Arbresh.info/