Kryeministri i vendit, Albin Kurti ka refuzuar për herë të tretë për të dëshmuar në Prokurorinë Speciale.

Kësaj radhe për të marrë pjesë në vendosjen e gurthemelit të një kopshti fëmijësh në qytetin e Gjilanit, ngjarje kjo e cila zhvillohet në të njëjtën kohë kur Gjykata e urdhëroi të intervistohet në Prokurorinë Speciale.

Vetë kryeministri ka thënë disa herë se nuk i ka refuzuar ftesat, por insiston që dëshminë të japë në zyrën e tij në Kryeministri.

Lidhur më këtë, ka reaguar Prokuroria Speciale e cila ka thënë se në këtë rast, do të veproj duke respektuar legjislacionin në fuqi.

Postimi i plotë:

Prishtinë, 4 mars 2025 – Prokuroria Speciale e Republikës së Kosovës, pas interesimit të shumë gazetarëve, informon se dëshmitari A.K. nuk është paraqitur në Prokurorinë Speciale për të dhënë dëshminë e tij edhe përkundër faktit se i njëjti ka qenë i obliguar me Urdhër të Gjykatës Themelore në Prishtinë që të paraqitet në cilësi të dëshmitarit, për të dhënë dëshminë e tij me datë 04.03.2025 në ora 10:00, në Prokurorinë Speciale të Republikës së Kosovës.

Prokuroria Speciale e Republikës së Kosovës edhe në këtë rast penal, sikurse në të gjitha rastet tjera do të veproj duke respektuar legjislacionin në fuqi./Arbresh.info