Deputeti i parlamentit slloven ka dhënë dorëheqjen pasi vodhi një sanduiç nga një dyqan në Lubjanë, ku ai tha se nuk kishte marrë shërbimin e kërkuar dhe ishte injoruar nga personeli.

Zoti Darij Krajcic tha për mediat vendase se ai ishte mërzitur që “u trajtua si i padukshëm” dhe vendosi të vërë në provë sigurinë e supermarketit. Vjedhja kaloi pa u vënë re, por një koleg i tija nga partia LSM, këmbënguli që zoti Krajcic të kthehej për të paguar. Ky i fundit ka kërkuar falje, duke thënë se i vinte keq për “eksperimentin e tij social” dhe ka përfunduar në titujt e gjithë gazetave dhe rrjeteve sociale për këtë ndodhi.

Anëtarët e tjerë të parlamentit filluan të tallen me këtë histori, por të enjten, kreu i partis LSM, Brane Golubovic, e dënoi veprimin e z. Krajcic duke e cilësuar si të ”papranueshëm”. “Ai mori të gjitha përgjegjësitë e tij për të dhe dha dorëheqjen, duke e vendosur vetë”, tha z. Golubovic për mediat vendase.