Çmimi për dramë origjinale shqipe “Katarina Josipi” i është ndarë dramës “Askushi”, të autorit Bashkim Hoxha. Kjo është bërë e ditur nga Ministria e Kulturës Rinisë dhe Sportit përmes një komunikate për media.

Në komunikatë thuhet se drama “Askushi”, e autorit Bashkim Hoxha ka fituar çmimin e parë, çmimi i dytë i është ndarë dramës“Një botë më tutje” të autorit Ardian-Christian Kyçyku dhe me çmimin e tretë juria e ka vlerësuar dramën “Shtrati me gozhda” të autorit Pashtrik Brahaj.

“Të tre laureatët shpërblehen financiarisht. Çmimi i parë ka vlerën prej 3600 euro, i dyti 2400 euro dhe çmimi i tretë ka vlerën e 1200 eurove. Në bazë të rregullores, drama që ka fituar çmimin e parë konsiderohet si dramë potenciale për inskenim në Teatrin Kombëtar të Kosovës, ndërkaq të tria dramat fitojnë të drejtën e leximit skenik në TKK dhe të botimit” shkruan komunikata e MKRS-së

Në komunikatë bëhet e ditur se juria profesionale është përbërë nga Besim Rexhaj, Bislim Muçaj, Agim Selimi, Agon Myftari dhe Zeta Bahtiri.

Ndarja e çmimeve është bërë përmes një ceremonie të organizuar nga MKRS-ja.