Pasuria e themeluesit të Facebook-ut, Mark Zuckerberg, këtë vit u rrit për 27.3 miliardë dollarë, pavarësisht shtimit të kritikave për monopolin e tij në rrjetet sociale. Tash ai ka pasuri të përgjithshme prej 79.4 milionë dollarësh.

Amerikani 35-vjeçar u radhit në vendin e pestë në listën e revistës “Forbes” për 500 njerëzit më të pasur të botës, ndonëse gjatë këtij viti është përballur me disa sfida jo të lehta.

Në tetor, Zuckerberg-u dha dëshmi para Komisionit të Dhomës së Përfaqësuesve për Shërbime Financiare rreth shqetësimeve për pronësinë e tij ndaj aplikacioneve “Whatsapp” dhe “Instagram”.

Megjithatë, paraqitja e tij para këtij komisioni nuk e pengoi kompaninë që ta përfundojë çerekun e vitit me 2.45 miliardë përdorues, 8 për qind më shumë se në të njëjtën periudhë të vitit të kaluar.

Kontribut të madh në fitimet e kompanisë kanë dhënë reklamat. Më herët, udhëheqësit e rrjetit më të madh social kishin refuzuar që t’i verifikojnë për fakte reklamat politike para zgjedhjeve presidenciale në Shtetet e Bashkuara.

Ndryshe, sipas indeksit “Bloomberg”, pasuria e përgjithshme e 500 personave më të pasur në botë ka shkuar në 5.9 trilionë dollarë, gati 25 për qind më shumë se vitin e kaluar, shkruan “Daily Mail”, transmeton Gazeta Express.