Të paktën 16 persona kanë vdekur pas një zjarri të madh që shpërtheu në një fabrikë veshjesh në Bangladesh, tha Shërbimi i Zjarrfikësve.

Zjarri, i cili shpërtheu në fabrikë rreth mesditës, u shua pas tre orësh. Por një depo kimikatesh, ngjitur fabrikës, vazhdoi të digjej, thanë autoritetet.

Zjarret e mëdha janë relativisht të zakonshme në Bangladesh, i cili ka popullsi të dendur, shpesh për shkak të standardeve të dobëta të sigurisë dhe infrastrukturës së mangët. Qindra persona janë vrarë nga zjarret në vitet e fundit, raporton Reuters.

Zyrtarët e zjarrfikësve nuk kanë përcaktuar se cili nga dy ndërtesat ka marrë flakën i pari.

Shumica e vdekjeve u shkaktuan nga gazi toksik dhe dera e çatisë së ndërtesës, që ishte e mbyllur, tha Shërbimi i Zjarrfikësve.

Shërbimi i zjarrfikësve tha se depozita kimikate nuk kishte asnjë leje apo autorizim të sigurisë nga departamenti i tyre.