Presidenti palestinez, Mahmoud Abbas, është ndaluar që të marrë pjesë në seancën e Asamblesë së Përgjithshme të Kombeve të Bashkuara në New York muajin e ardhshëm, pasi atij dhe 80 zyrtarëve të tjerë u janë revokuar vizat, ka thënë Departamenti i Shtetit.

Sekretari amerikan, Marco Rubio, i ka fajësuar zyrtarët për minim të përpjekjeve për paqe dhe se po kërkojnë “njohje të njëanshme të një shteti të supozuar palestinez”.

Vendimi, i mirëpritur nga Izraeli, është i pazakontë pasi SHBA-ja pritet të lehtësojë udhëtimin për zyrtarët e të gjitha shteteve që duan të shkojnë në selinë e OKB-së, raportoi BBC.

Ndalimi vjen teksa Franca udhëheq përpjekjet ndërkombëtare për njohjen e shtetit palestinez në seancë – lëvizje që administrata e Donald Trumpit e ka kundërshtuar.

Zyra e Abbasit ka thënë se vendimi është kundër të drejtës ndërkombëtare dhe Marrëveshjes së OKB-së.