Qindra njerëz, të zemëruar për shkak të parregullsive në zgjedhjet parlamentare në Rusi, protestuan në qendër të Moskës.

Protestuesit mbanin pankarta, dhe një nga mbishkrimet shkruante “ktheni zgjedhjet”, sipas Reuters, transmeton portal arbresh.info

Protesta u organizua nga disa politikanë, kryesisht komunistë, të cilët pretendojnë se fitorja e tyre ishte vjedhur nga manipulimet duke votuar në internet, prandaj ata po kërkojnë që këto zgjedhje të mos njihen.

Kremlini ka njoftuar se votimi elektronik do të përdoret në zgjedhjet e ardhshme në të gjithë vendin, i cili së fundmi u përdor vetëm në Moskë dhe disa rajone tjera.

Policia ruse arrestoi aktivistët e opozitës dje dhe paralajmëroi se ata do të shpërndanin të gjitha tubimet ilegale gjatë fundjavës, por nuk pati arrestime në protestën e sotme.

Policia e Moskës tha se në protest ishin rreth 400 pjesëmarrës, duke përfshirë edhe gazetarë, ndërsa një dëshmitar i Reuters ka theksuar se rreth 1500 njerëz po merrnin pjesë në protestë.

Sipas rezultateve përfundimtare të zgjedhjeve, Rusia e Bashkuar në pushtet, pranë Presidentit Vladimir Putin, fitoi 324 nga 450 vendet në dhomën e ulët të parlamentit, më shumë se dy të tretat e asaj që nevojitet për të ndryshuar kushtetutën.

Komunistët zunë vendin e dytë, me 57 vende dhe tre parti të tjera hynë në parlament.

Pjesa më me ndikim e opozitës nuk mori pjesë në zgjedhje, pasi autoritetet ruse shpallën ekstremiste organizatat e kritikut kryesor të Kremlinit, Alexei Navalny dhe ndaluan kandidaturën e kujtdo që lidhej me to.

Votimi u shënua me akuza të shumta për parregullsi, përfshirë manipulimin e votave dhe votimin e shumëfishtë nga të njëjtët njerëz në qendra të ndryshme votimi./arbresh.info/