Pas një ndërprerjeje 48-orë nga qeveria talebane, shërbimet e internetit dhe komunikimeve janë rikthyer, duke sjellë gëzim të madh në Kabul.

Siç raporton BBC, rikthimi i internetit erdhi me urdhër të kryeministrit taleban.

Qytetarët dolën në rrugë për të përhapur lajmin e mirë. Një banor i Kabulit tha:

Të gjithë janë të lumtur, mbajnë telefonat celular dhe flasin me të afërmit e tyre!

Po pse u ndërpre interneti?

Talibanët nuk dhanë një shpjegim zyrtar për ndërprerjen, por muajin e kaluar, një zëdhënës i guvernatorit në provincën veriore Balkh tha se qasja në internet ishte bllokuar “për të kufizuar sjelljet e këqija”.

Që nga rikthimi i tyre në pushtet në 2021, talibanët kanë imponuar kufizime të shumta sipas interpretimit të tyre të ligjit islamik, duke përfshirë ndalimin e edukimit për vajzat mbi 12 vjeç dhe kufizime të ashpra në punësimin e grave.

Gjatë ndërprerjes, qyteti ishte i qetë, bankat dhe qendrat tregtare pothuajse të mbyllura, ndërsa shumat monetare nga jashtë nuk mund të hynin në Afganistan.

Banorët e Kabulit e krahasuan rikthimin e internetit me festën Eid al-Adha (një nga dy festat më të rëndësishme islame, e njohur edhe si Festa e Sakrificës).

Rikthimi i internetit ka rikthyer shpresën dhe komunikimin, megjithëse situata në Afganistan mbetet e paparashikueshme dhe jashtë kontrollit./tvklan.al