Autoritetet turke kanë arrestuar 343 persona gjatë protestave që shpërthyen gjatë natës së dielë në disa qytete të Turqisë, pas arrestimit të kryetarit të Stambollit, Ekrem Imamoglu.

Ministria e Brendshme tha se protestat u mbajtën në dhjetëra qytete, përfshirë Stambollin dhe Ankaranë, dhe se arrestimet u kryen për të parandaluar “prishjen e rendit publik”. Autoritetet paralajmëruan se nuk do të toleronin “kaos dhe provokim” gjatë këtyre demonstratave.

Protestat, të cilat filluan më 22 mars, janë zhvilluar kryesisht në mënyrë paqësore, me dhjetëra mijëra turq që dolën në rrugë për të protestuar kundër arrestimit të Imamoglu, i cili është rivali kryesor politik i presidentit turk, Recep Tayyip Erdogan. Imamoglu u arrestua nën akuzat për korrupsion dhe ndihmë ndaj një grupi terrorist.

Partia e Imamoglu, Partia Popullore Republikane (CHP), e ka dënuar arrestimin e tij, duke e cilësuar atë si një veprim politik dhe ka kërkuar që mbështetësit të protestojnë në mënyrë të ligjshme. Imamoglu, 54 vjeç, u arrestua në një kohë kur CHP-ja po përgatiste shpalljen e tij si kandidat për zgjedhjet presidenciale të ardhshme.

Zgjedhjet presidenciale në Turqi janë planifikuar për vitin 2028, por ka mundësi që Erdogan, 71 vjeç, të shpallë zgjedhje të parakohshme për të shmangur kufizimin e mandatit të dytë, nëse vendos të garojë përsëri./ abcnews.al