Presidenti turk Rexhep Tajip Erdogan u tha të dielën udhëheqësve rusë dhe francezë se është arritur një “pikë kthese historike” në përpjekjet për t’i dhënë fund luftës Rusi-Ukrainë dhe se Ankaraja ishte gati të priste bisedime midis dy palëve ndërluftuese, tha zyra e tij.

Turqia, anëtare e NATO-s, është përpjekur të ruajë marrëdhënie të mira me të dy fqinjët e saj në Detin e Zi që nga fillimi i pushtimit rus dhe ka pritur dy herë bisedime që synojnë t’i japin fund luftës.

Presidenti ukrainas Volodymyr Zelensky theksoi të dielën se priste që Moska të angazhohej për një armëpushim 30-ditor, duke shtuar se Kievi ishte “gati” të takohej me Rusinë për bisedime të drejtpërdrejta për armëpushim nëse do ta bënte këtë.

Komentet e tij erdhën pasi presidenti rus Vladimir Putin propozoi negociata të drejtpërdrejta me Ukrainën më 15 maj në Stamboll, por nuk e trajtoi propozimin për armëpushim 30-ditor.

Erdogan përshëndeti deklaratën e udhëheqësit rus se bisedimet e paqes duhet të rifillojnë në Stamboll aty ku u ndalën, në një telefonatë me Putinin të dielën, njoftoi zyra e tij.

Ai i tha Putinit se “Turqia është gati të presë negociata që synojnë arritjen e një zgjidhjeje të qëndrueshme”, sipas zyrës së tij.

Erdogani tha gjithashtu se “është hapur një dritare mundësie për arritjen e paqes dhe se arritja e një armëpushimi gjithëpërfshirës do të krijonte mjedisin e nevojshëm për bisedime paqeje”. /Telegrafi/