Një tren pasagjerësh doli nga shinat teksa udhëtonte në Alpet zvicerane, si pasojë e një orteku të fuqishëm.

Aksidenti ndodhi në afërsi të qytetit Gopenshtajn, ku autoritetet kishin dhënë alarmin e dytë për rrezikun nga orteqet, në nivelin 4 nga 5 në total. Treni doli nga shinat rreth orës 7 të mëngjesit të së hënës, kur në bordin e tij udhëtonin 29 pasagjerë, bëri të ditur policia e kantonit Vale.

“Nga hetimet paraprake është arritur në përfundimin se një ortek mund të ketë kaluar në hekurudhë pak momente përpara se të kalonte treni dhe vagonët e tij”, njoftoi policia përmes një komunikate.

Sipas autoriteteve lokale, nga incidenti mbetën të plagosur 5 persona, njëri prej të cilëve u dërgua në spitalin më të afërt, ndërsa 4 të tjerët u mjekuan në vendngjarje.

Operatori federal i trenit, CFF, publikoi në faqen e tij të internetit se trafiku hekurudhor mes lokaliteteve Gopenshtajn dhe Brig ishte pezulluar.

Gopenshtajn, një pikë kyçe për ngarkimin dhe shkarkimin e mallrave të transportit rrugor e hekurudhor, ndodhet në dalje të tunelit Lotshberg, në 1.216 metra lartësi mbi nivelin e detit.

Së fundmi, fshati ka përjetuar reshje të dendura dëbore. Autoritetet vendase shtuan se Prokuroria Publike e Zvicrës ka hapur një hetim për përcaktimin e shkaqeve të aksidentit.