Një i ri palestinez u plagos rëndë nga zjarri i hapur nga ushtria izraelite në Bregun Perëndimor të pushtuar sot, sipas Ministrisë së Shëndetësisë, transmeton Anadolu Agency (AA).

Në një deklaratë të ministrisë thuhet se një 21-vjeçar u qëllua në shpatull nga forcat izraelite dhe u shtrua në një spital në qytetin Qalqilya për ndihmë mjekësore.

Në deklaratë thuhet se i riu i plagosur është në gjendje kritike.

Sipas dëshmitarëve okularë, i riu palestinez u qëllua pranë murit ndarës izraelit në jug të Qalqilya-s.

Nuk kishte asnjë koment nga autoritetet izraelite për incidentin.

Izraeli ka mbyllur të gjitha hapjet e murit pas tensioneve në rritje në territoret palestineze në javët e fundit për shkak të fushatave të përsëritura izraelite të arrestimit dhe inkursioneve të kolonëve në kompleksin e xhamisë Al-Aksa në Kudsin Lindor të pushtuar.

Të premten, tre izraelitë u vranë në një sulm të dyshuar palestinez në qytetin Elad pranë Tel Avivit.

Hyrjet në murin ndarës përdoren nga mijëra punëtorë palestinezë për të arritur në vendet e tyre të punës brenda Izraelit.