Kadri Morinaj, anëtar Nderi i Akademisë Papale Bonificiana, e vuri theksin te rëndësia që i duhet kushtuar brezit të ri dhe studentëve shqiptarë që studiojnë në institucionet akademike perëndimore dhe vlerat që ata i japin shoqërisë shqiptare pas studimeve.

“Është një fat për mua që, siç kam bërë në vende të tjera, të vij edhe këtu në Madrid të shpalos mundësitë që ka Shqipëria për investime të huaja, për zhvillimin e partneritetit, siç ishin takimet e mia me akademikë në universitete, me industrialistë dhe përfaqësues të botës financiare mjaft të fuqishëm nga Nju Jorku”, tha Kadri Morinaj, president i “EUROSIG” dhe “INSIG”.

Në mbrëmjen gala në Madrid, për Top Channel u prononcua edhe anëtari i familjes mbretërore spanjolle, Enrique de Barbon.

“Ne jemi shumë të lumtur të kemi mes nesh zotin Kadri Morinaj, një biznesmen mjaft të suksesshëm. Ne në Spanjë kemi nevojë të mësojmë më shumë për Shqipërinë, sepse nuk dimë shumë për këtë vend, e çdo informacion për Shqipërinë e mrekullueshme është i mirëpritur këtu në Spanjë. Jemi të kënaqur që ai ndodhet mes nesh”, tha Enrique de Barbon.

Biznesmeni Kadri Morinaj është i njohur si filantrop dhe promovues i vlerave më të spikatuara të kombit shqiptar, siç ishte rasti i përmendores së Nënë Terezës në Brazil dhe promovimi i Heroit Kombëtar Skënderbeu, si mbrojtës i Krishtërimit.