Është risjellë në debatin publik evropian rasti i përgjimit të disa politikanëve të lartë nga agjencitë amerikane. Edhe Danimarka mësohet se u përfshi në skandal në vitet 2012, ndërsa kancelarja Merkel, si viktimë e pretenduar e tij, kërkon shpjegime nga të dy partnerët.

Fuqitë europiane i kanë kërkuar shpjegime Amerikës dhe Danimarkës për skandalin e vjetër të përgjimeve.

Shërbimi Informativ i Danimarkës dhe Agjencia amerikane për Sigurinë Kombëtare raportohet se punuan bashkë në vitet 2012-2014 duke spiunuar telefonatat dhe mesazhet e disa politikanëve të lartë evropianë, mes tyre edhe kancelarja gjermane, Angela Merkel.

“Danimarka, qeveria dhe ministri i Brendshëm danez e kanë shprehur qartë mendimin për këtë rast dhe kjo është pozitive, por nevojiten sqarime që të ketë besim në marrëdhënien tonë”, transmeton oranews.

Edhe presidenti i Francës, Emanuel Makron, e cilësoi përgjimin e aleatëve dhe partnerëve nga ana e Amerikës, diçka të papranueshme.

“Jemi në pritje të përgjigjeve. Nga njëra anë kërkojmë t’i hidhet dritë fakteve të shkuara, por sidomos të qartësojmë praktikat e tanishme.”

Shërbimet inteligjente amerikane i mblodhën informacionet nga zyrtarët gjermanë, francezë, suedezë e norvegjezë përmes palës daneze.

Kur skandali u bë i njohur në 2013-ën, Shtëpia e Bardhë nuk e mohoi qartësisht por tha se telefoni i kancelares Merkel nuk ishte në përgjim.

Presidenti aktual i SHBA-së, Xho Bajden, është akuzuar si i përfshirë në skemë pasi në ato vite kishte rolin e zv.presidentit të Amerikës.