Rusia ka përsëritur se qëllimi pse vendi mban armë bërthamore është për t`u mbrojtur në rast se i kërcënohet siguria, dhe Perëndimi duhet ta ketë parasysh këtë.

Ministri i Jashtëm rus, Sergei Lavrov, deklaroi se Shtetet e Bashkuara dhe aleanca e NATO-s po rrezikojnë shumë me ndërhyrjet në konfliktin e saj luftarak me Ukrainën.

“Kemi një situatë ku janë të përfshira direkt fuqitë bërthamore. Ne besojmë se kjo duhet evituar, prandaj edhe u kujtojmë atyre herë pas here se ekzistojnë shumë rreziqe ushtarake e politike, prandaj edhe i sinjalizojmë kundërshtarët tanë,” u shpreh Lavrov për revistën shtetërore “The International Affairs”.

Presidenti amerikan, Joe Biden, ka thënë se kërcënimi rus me armët bërthamore është “real”.

Nga ana e vet, NATO-ja ka informuar se nuk sheh lëvizje të forta që të tregojnë se Rusia ka ndryshuar qëndrim për sa i përket forcës së vet bërthamore.

Të enjten, edhe presidenti bjellorus Alexander Lukashenko, një nga aleatët e ngushtë të presidentit rus Vladimir Putin, paralajmëroi se do të përdorë armët bërthamore që i ka vënë në dispozicion Rusia nëse ndeshet me një agresion të jashtëm prej Polonisë, Lituanisë apo Letonisë./rtsh