Kryeministri spanjoll Mariano Rajoy ka gjasa të largohet nga zyra, pasi një parti kyçe ka thënë se do të mbështesë mocionin e mosbesimit kundër tij.

Votimi, që pritet të mbahet sot, është propozuar nga Socialistët e opozitës, pasi Partia e Popullit nga vjen edhe Rajoy u përfshi në një skandal korrupsioni, transmeton portali arbresh.info.

Liderit të Partisë Socialiste, Pedro Sanchez i duhen 176 vota për të marrë udhëheqjen.

Partia e Nacionalistëve Baskë, që ka pesë ulëse në parlament thotë se do t’i japë përkrahje mocionit.

Sánchez i ka bërë thirrje z. Rajoy të japë dorëheqjen para votimit. Por një zyrtar i lartë i PP-së këmbënguli se kryeministri nuk do të jepte dorëheqjen.

Sánchez thotë se zoti Rajoy, 63 vjeç, nuk kishte marrë përgjegjësinë për përfshirjen e partisë së tij, e cila doli në dritë javën e kaluar pasi një nga ish-arkëtarët e saj u dënua me 33 vjet burg.

Gjykata e Lartë në Madrid dënoi Luis Bárcenas për marrjen e ryshfetit, pastrimit të parave dhe krimeve të taksave.

Rasti u përqendrua në një fond të fshehtë të fushatës, që PP e zhvilloi nga 1999 deri në 2005./Arbresh.info/