Autoritetet kineze kanë deklaruar se ujgurët dhe pakicat e tjera kombëtare janë liruar nga kampet e rajonit Xinjiang, ndonëse për një gjë të tillë nuk kanë ofruar ndonjë dëshmi.

Si kundërpërgjigje ndaj kritikave të shumta ndërkombëtare për ndalimin e rreth 1.5 milionë njerëzve në kampe, guvernatori i rajonit Xinjiang, Shohrat Zakir, tha para gazetarëve në Pekin se personat që më parë kanë qenë duke qëndruar në kampe i janë kthyer shoqërisë.

Kina për një kohë të gjatë ka mohuar se menaxhon kampe që nga aktivistët për të drejtat e njeriut janë cilësuar si kampe të riedukimit, ku personat e ndaluar janë të detyruar t’i nënshtrohen indoktrinimit politik. Në vend të kësaj, autoritet thonë se këto kampe shërbejnë për trajnimin e personave vullnetarë për shkathtësi të ndryshme profesionale.

“Tash, të gjithë të trajnuarit i kanë përfunduar studimet, kanë gjetur vende pune të qëndrueshme me ndihmën e qeverisë, e kanë përmirësuar cilësinë e jetës dhe po e jetojnë një jetë të lumtur”, tha guvernatori Zakir.

Sipas tij, personat e trajnuar e kanë mësuar gjuhën kineze, ligjet e shtetit dhe aftësitë profesionale me qëllim të eliminimit të ekstremizmit.

Megjithatë, sipas disa dokumenteve qeveritare, të cilat janë parë nga disa medie ndërkombëtare, personat e mbajtur në këto kampe i janë nënshtruar transformimit edukues dhe kanë qenë të detyruar të qëndrojnë në kampe për së paku një vit, shkruan “The Guardian”, transmeton Gazeta Express.