Katër qytete në rajonin e Katalonjës në Spanjë, janë vënë në karantinë për shkak të pandemisë së coronavirusit.

Sipas mediave të huaja, përcjell Telegrafi, 66 mijë banorët e vendeve të Igualada, Odena, Santa Margarida de Montbui dhe Vilanova del Cami, nuk mund të dalin nga qyteti, ndërsa mund të dalin nga shtëpia, ka deklaruar agjencia e mbrojtjes civile të enjten.

Ministri i Shëndetësisë në Katalonjë, Alba Verges, tha në një konferencë për shtyp se autoritetet do të përqendrohen në Igualada, një qytet me 40 mijë banorë, i cili është vetëm 70 kilometra larg nga kryeqyteti rajonal Barcelona.

Raportohet se aktualisht janë konfirmuar 58 raste në Igualada, 38 më shumë që nga dita e mërkurë.

Ndërsa Bashkimi Evropian përpiqet të merret me pandeminë, Italia ka “shtrirë” karantinën në të gjithë vendin, duke lejuar daljen e qytetarëve vetëm për raste emergjente.

Autoritetet në Romë gjithashtu kanë urdhëruar mbylljen e të gjitha dyqaneve që konsiderohen jo thelbësore për vendin.