Presidenti i vetëshpallur dhe i mbështetur nga fuqitë e mëdha, Juan Guaido ka falënderuar kryediplomatin kosovar Behgjet Pacollin për mbështetjen ndaj Venezuelës.

“Faleminderit ministri Pacolli dhe qeverisë së Kosovës për qëndrimin e vendosur në përkrahjen e kauzës venezuelase. Ne do të vazhdojmë të punojmë për të rivendosur demokracinë tonë dhe të arrijmë zgjedhje të lira në Venezuelë”, shkruan Guaido, transmeton portali arbresh.info.

Guaido i është përgjigjur reagimit të ministrit të jashtëm Pacolli ndaj një sulmi që iu bë konvojit të tij jashtë Parlamentit të Venezuelës.

“Skenat e dhunës dhe frikësimit kundër kryetarit të Asamblesë janë shqetësuese. Kjo duhet të ndalojë. Kosova është e vendosur në mbështetjen e saj për Juan Guaidon dhe njerëzit që punojnë me të për të udhëhequr Venezuelën drejt zgjedhjeve demokratike dhe nxjerrjen nga kriza të popullit. Maduro duhet të shkojë”, thuhej në shkrimin e Pacollit.

Shteti i Kosovës e njeh kreun e opozitës së Venezuelës, Juan Guaidó, si President i përkohshëm i Venezuelës./arbresh.info/