Grupet e mirëqenies së kafshëve në ishullin grek të Sirosit po ofrojnë akomodim, shërbime dhe mëngjes falas për vullnetarët që ndihmojnë në kujdesin e popullatës së madhe të maceve endacake në ishull, sipas “Time Out”.

I menaxhuar nga “Syros Cats”, programi kërkon angazhimin e vullnetarëve për disa javë duke ushqyer, pastruar dhe kujdesur për macet në këmbim të një akomodimi, shpesh me pamje nga deti.

Vullnetarët duhet të jenë përgjegjës, në formë dhe të aftë të angazhohen për të paktën dy deri në gjashtë javë (minimumi një muaj).

Në këmbim të akomodimit, mëngjesit dhe shërbimeve falas, vullnetarët do të kalojnë pesë orë në ditë, ë pesë ditë të javës duke u ushqyer, pastruar dhe mjekuar kafshët.

Misioni i organizatës është të menaxhohet trajtimi i rreth 3 000 maceve endacake në ishull – përmes TNR (sterilizimit human), të monitorohet shëndeti i tyre dhe të ofrohet kujdes veterinar kur është e nevojshme.

Kjo është një mundësi e artë për adhuruesit e kafshëve në vend të pushimeve tradicionale, pasi puna është fizikisht e vështirë, por shpërblyese, sipas “TravelPirates” dhe “Syros Cats”.

Organizata “Syros Cats”, e cila ka qenë në funksion që nga vitet 1990 dhe konsiderohet si një pioniere e lëvizjes për mirëqenien e kafshëve në ishull, po kërkon njerëz të aftë, të shëndetshëm dhe të pavarur për të ndihmuar në trajtimin e maceve.

Detyrat që do t’u jepen vullnetarëve përfshijnë pastrimin, ushqyerjen, socializimin e maceve të vogla të shpëtuara – për t’i ndihmuar ato të përgatiten për shtëpitë e ardhshme.

Ndërsa e gjithë kjo tingëllon si një mënyrë e bukur për të kaluar disa javë në ishull, puna e “Syros Cats” është thelbësore për identitetin e këtij ishulli.

Falë “Syros Cats” dhe “God’s Little People Cat Rescue”, marrëdhënia midis maceve dhe vendasve ka ndryshuar – nga një armiqësi në respekt të ndërsjellë – me ishullin që tani e përqafon popullatën e tij të maceve si një emblemë krenarie.

“Ne duam t’i tregojmë botës se kafshët kanë rëndësi”, tha Richard Bowell, bashkëthemelues i “God’s Little People Cat Rescue” për “Greek Reporter”.