Me mijëra vetë janë mbledhur sërish në Hong Kong përpara zyrave qeveritare, megjithëse ekzekutivi e pezulloi për momentin projektligjin e ekstradimeve në Kinën kontinentale, i cili është shkaku i kësaj dallge të indinjatës popullore.

Krerët e protestës kërkojnë që nga ky pan të hiqet dorë përfundimisht. Disa madje kanë kërkuar dorëheqjen e shefes së ekzekutivit, Carrie Lam.

Shumë prej protestuesve mbanin në dore pankarta ku akuzohej Kina për “vrasjen” e rezidenteve të Hong Kongut; të tjerë përcillnin mesazhe mbështetje për të lënduarit gjatë trazirave.

Qeveria e Kinës pretendon se projektligji i propozuar për ekstradimet do ta bënte vendin më të pasigurt për kriminelët, por kritikët këmbëngulin se kjo do të ndikonte drejtëpërdrejtë në pavarësinë e gjyqësorit.

Hong Kongu ka qenë koloni britanike, por u kthye nën sundimin kinez më 1997, nën parimin “një shtet, dy sisteme”. Ndryshimet në projektligj do të mundësonin që kërkesat për ekstradim nga autoritetet e Kinës, Taivanit dhe Makaut, të vendosen nga gjykatat e Hong Kongut.

Ky propozim vjen pas një rasti të profilit të lartë ku një qytetar i Hong Kongut vrau të dashurën e tij gjatë pushimeve në Taivan dhe nuk u arrit të ekstradohej.