Ministri i Brendshëm gjerman, Alexander Dobrindt, ka propozuar integrimin e mësimeve për kriza dhe përgatitje për luftë në kurrikulat shkollore, mes tensioneve në rritje me Rusinë.

Dobrindt, një anëtar i CSU-së së qendrës së djathtë, tha se planifikon ta ngrejë çështjen në takimin e muajit të ardhshëm me ministrat e brendshëm nga shtetet federale.

“Propozimi im është që brenda një viti shkollor, nxënësit e klasave të larta të kalojnë dy orë mësimi radhazi duke diskutuar se cilat skenarë kërcënimi mund të ekzistojnë dhe si të përgatiten për to”, tha Dobrindt.

Ai gjithashtu vuri në dukje se fëmijët shërbejnë si bartës të rëndësishëm të njohurive brenda familjeve dhe se kjo qasje mund të ndihmojë në rritjen e ndërgjegjësimit në shtëpi.

Ndryshe, komentet e Dobrindt vijnë në mes të tensioneve në rritje midis vendeve evropiane dhe Rusisë.

Ministri i brendshëm konservator ka akuzuar së fundmi Rusinë se po zhvillon një “luftë hibride” kundër Gjermanisë dhe partnerëve të saj evropianë përmes fushatave të dezinformimit, operacioneve të ndikimit, sulmeve kibernetike dhe sabotimit.

Udhëheqësit politikë dhe ushtarakë të Gjermanisë kanë paralajmëruar vazhdimisht se vendi duhet të jetë “i gatshëm për luftë” deri në vitin 2029, mes shqetësimeve të shtuara rreth aftësive dhe qëllimeve ushtarake të Rusisë.

Shefi i Mbrojtjes Gjenerali Carsten Breuer paralajmëroi më parë këtë vit se Rusia do të ishte e aftë të niste një sulm ndaj një vendi të NATO-s brenda katër deri në shtatë viteve të ardhshme. /Telegrafi/