Britania dhe Shtetet e Bashkuara paralajmëruan Rusinë të shtunën për “pasoja serioze” nëse trupat ruse pushtojnë Ukrainën, ndërsa takimi i ministrave të jashtëm të G7 po zhvillohet në Liverpool.

Sipas medieve të huaja, përcjell Telegrafi, në bisedimet përpara mbledhjes së grupit të shtatë fuqive kryesore ekonomike perëndimore, sekretarja e jashtme britanike Liz Truss dhe homologu i saj amerikan Antony Blinken ranë dakord për mbështetjen e tyre për Ukrainën, tha të shtunën një zëdhënës i Zyrës së Jashtme Britanike.

Britania dhe SHBA thanë se mbeten të shqetësuara për lëvizjet ushtarake ruse pranë kufirit me Ukrainën.

Sipas NATO-s, Rusia ka mbledhur midis 75,000 dhe 100,000 ushtarë në zonë.

Ndryshe, ministrat e jashtëm të G7 filluan bisedimet e tyre në Liverpool të shtunën në mëngjes.

Përveç Britanisë nikoqire, grupi përfshin Gjermaninë, Shtetet e Bashkuara, Francën, Kanadanë, Japoninë dhe Italinë.

Ministrja e re e Jashtme e Gjermanisë, Annalena Baerbock, u mirëprit zyrtarisht nga mikpritësja Truss në Muzeun e Liverpool-it përpara se të takohej me homologët e saj të tjerë nga grupi i shtatë vendeve.

Sesioni i parë i punës ishte për t’u fokusuar në sfidat aktuale gjeopolitike të tilla si ballafaqimi me Rusinë, Kinën dhe Iranin.

Takimi dyditor është i dyti nën kryesimin britanik këtë vit, por i pari për Baerbock dhe gjithashtu për Truss, që ka qenë në detyrë vetëm që nga një riorganizim i kabinetit disa muaj më parë. /Telegrafi/