Shumë norvegjezë e kanë hedhur poshtë ofertën e sugjeruar nga Presidenti i SHBA-ve, Donald Trump, i cili tha se “ata do të ishin të mirëpritur të emigronin në SHBA”.

Trump këtë koment e ka bërë pasi ka quajtur emigrantët nga  Haiti, El Salvadori dhe vendet afrikane të ardhur nga  “vende m***”, transmeton portali arbresh.info

Vendi nordik, që konsiderohet një ndër vendet më të pasura në botë për kokë banori, vitin e kaluar është emëruar si kombi më i lumtur në planet. Trump përmendi Norvegjinë në komentet nënçmuese rreth vendeve të tjera të migrimit, pasi senatorët e SHBA e informuan atë të enjten mbi një projekt-ligj të sapo hartuar dypalësh të emigracionit, sipas dy burimeve që kërkuan të mbeten të paidentifikuara.

Liderët botëore kanë dënuar ashpër gjuhën e përdorur nga Trump, ndërsa OKB ka reaguar duke e quajtur komentin e tij “racist”.

Reagim nga Norvegjia ka bërë edhe Torbjoern Saetre, një politikan që përfaqëson Partinë Konservatore të Norvegjisë në një komunë pranë Oslo, i cili në rrjetet sociale ka shkruar: “Në emër të Norvegjisë: Faleminderit, por jo faleminderit!”

Ndërsa qindra mijëra norvegjezë emigruan në SHBA në shekullin e 19-të, vetëm 502 njerëz nga një popullsi prej 5.3 milionë banorësh shkuan atje në vitin 2016./arbresh.info/