Dy pacientë të infektuar me koronavirus kanë vdekur në një spital gjerman, pasi dyshohet se një mjek ka administruar ilaçe që çuan në vdekje të menjëhershme

Autoritetet po hetojnë rrethanat e vdekjes së pacientëve, të moshës 47 dhe 50 vjeç, të cilët ishin duke u trajtuar për sëmundjen e shkaktuar nga COVID-19. Mjeku, i cili tani po përballet me akuza për vrasje, ka punuar që nga shkurti i këtij viti në Spitalin Universitar në qytetin Essen në Nordrhein-Westfalen (NRW). Mjeku 44-vjeçar u arrestua dhe është në paraburgim, tha policia.

Të dy pacientët vdiqën më 13 dhe 17 nëntor. Sipas spitalit, dyshimi për vdekjet e kishte shtyrë atë të pezullojë mjekun dhe të njoftojë menjëherë prokurorët.

Sipas policisë së Essenit, në një rast i akuzuari deklaroi se donte t’i jepte fund vuajtjeve të mëtejshme të pacientit COVID-19 dhe të afërmve të tij. Raportet pretenduan se të dy pacientët e vdekur kishin qenë në gjendje shumë kritike në pavijonin e mjekut, i cili besohet të jetë reparti që trajton pacientët e infektuar.

Mjeku dyshohet se u dha injeksione vdekjeprurëse pacientëve që çuan në vdekjen e tyre. Sipas gazetës Bild, mjeku informoi familjet e pacientëve para se të administronte injeksionet. Prokurorët thanë se ata aktualisht nuk janë në gjendje të nxjerrin detaje të mëtejshme të incidenteve ndërsa hetimi po vazhdon.

Sidoqoftë, sipas një vendimi gjyqësor të lëshuar vitin e kaluar, në Gjermani, pacientët e sëmurë mund të kërkojnë ndihmë për t’i dhënë fund jetës. Por është e paqartë nëse kjo ka ndodhur në rastin e të dy pacientëve me COVID-19. Vdekja e asistuar është veçanërisht e ndjeshme në Gjermani për shkak të trashëgimisë së Holokaustit kur nazistët vranë gjashtë milionë hebrenj.