Ministrja e Arsimit, Arbërie Nagavci njofton se sot ka nënshkruar kontratë për ndërtimin e çerdhes “Ganimete Tërbeshi” në Gjakovë.

Me anë të një postimi në Facebook, Nagavci tha se 120 fëmijë do të kenë qasje në ambientet e çerdhes, përcjell Arbresh.info.

“Më shumë mundësi për fëmijët e Gjakovës! Sot kemi hedhur një hap të rëndësishëm drejt zgjerimit të edukimit parashkollor në Gjakovë! Kam nënshkruar kontratën për ndërtimin e çerdhes publike “Ganimete Tërbeshi”, me ç’rast 120 fëmijë të kësaj komune do të kenë qasje në një ambient të sigurt, të ngrohtë dhe me standarde të larta edukative”, ka shkruar Nagavci.

“Ky investim prej 1,047,221.59 euro është një tjetër dëshmi e përkushtimit tonë për t’u ofruar fëmijëve tanë një fillim të mbarë në rrugëtimin e tyre arsimor. Edukimi fillon nga fëmijëria – dhe ne do të vazhdojmë të investojmë për të ardhmen e tyre!”, shtoi tutje Nagavci./Arbresh.info