Ministria e Arsimit dhe Shkencës ka kërkuar nga Drejtoritë Komunale të Arsimit që të hënën të mos mbahet mësimi në shkollat , të cilat më 14 shkurt do shndërrohen në qendra votimi për zgjedhjet e jashtëzakonshme parlamentare.

Sipas MASH-it, kjo për arsye të sigurisë së shëndetit të nxënësve, pasi ka rrezik të përhapjes së pandemisë Covid-19, shkruan arbresh.info.

“Ministria e Arsimit dhe Shkencës ka kërkuar nga Drejtoritë Komunale të Arsimit, që të hënën, 15 shkurt 2021, të mos mbahet mësimi në shkollat që një ditë më parë kanë qenë qendra votimi, në mënyrë që të mbrohet shëndeti i nxënësve, mësimdhënësve dhe stafit tjetër të shkollës nga pandemia COVID-19. Këtë kërkesë, MASh e ka bërë për arsye se, në këto shkolla, gjatë ditës së zgjedhjeve do të ketë frekuentim të madh të akterëve të përfshirë në procesin zgjedhor”, thuhet në njoftimin e MASH-it.

MASh ka kërkuar që këto shkolla, të ajrosen mirë dhe të dezinfektohen në mënyrë që të martën, më 16 shkurt të jenë të gatshme për mbajtjen e mësimit.

Ministria e Arsimit dhe Shkencës bën me dije se dita e humbur e mësimit do të zëvendësohet dhe DKA-të në bashkëpunim me shkollat duhet të vendosin për ditën e përshtatshme që mund të zëvendësohen orët e humbura./arbresh.info/