Deputetja e Lidhjes Demokratike të Kosovës dhe ish-ministrja e Arsimit, Hykmete Bajrami i ka rekomanduar SBASHK-ut që të rishikojë kërkesat duke pranuar oferta e Qeverisë për shtesën 50 euro, por kjo shtesë të vazhdoj deri me 31 dhjetor. Kurse, më 1 janar të fillojë implementimi i Ligjit të Pagave.

Bajrami e cila ka qenë edhe ish-ministre e Financave, ka shkruar në Facebook se në rast se Ligji i Pagave nuk hyn në fuqi, të planifikohet buxhet që shtesa prej 50 euro të vazhdojë deri në hyrjen në fuqi të këtij ligji.

Postimi i ish-ministres Bajrami:

PROPOZIM PËR SBASHK-un DHE QEVERINË

Sot u bë një muaj që arsimi në vendin tonë është në grevë.

Kemi humbë shumë, kemi humbë të gjithë.

I rekomandoj SBASHK-ut që të rishikoj kërkesat kështu:

– Të pranohet oferta e Qeverisë për shtesën 50 euro, por kjo shtesë të vazhdoj deri me 31.12.2022.

– Me 01.01.2023 të filloj implementimi i Ligjit të Pagave. Në rast se Ligji i Pagave nuk hyn në fuqi, të planifikohet buxhet që shtesa prej 50 euro të vazhdoj deri në hyrjen në fuqi të këtij ligji.

– Qeveria të mos zbatoj ndëshkime në paga, për muajin shtator.

I rekomandoj Qeverisë t’i pranoj këto kërkesa.

Shkollat dhe qerdhet të hapën të hënën. /arbresh.info/