“Shkarkim Prokurorit – Veting Gjyqësorit”, është motoja e kësaj proteste, e cila pritet të mbahet të mërkurën, më 22 gusht, duke filluar nga ora 18:00, dhe vendtakimi pritet të jetë Sheshi “Zahir Pajaziti”.

Për vetëm pak kohë nga thirrja publike nëpër rrjete sociale për të marrë pjesë në këtë protestë është vërejtur një interesim i madh i qytetarëve.

Kjo kërkesë e tyre për të protestuar dhe kërkuar largimin e Aleksandër Lumezit, nga posti i kryeprokurorit të shtetit, ka ardhur pas akuzave të ish-prokurorit Elez Blakaj, për politizim të Prokurorisë kosovare.

Blakaj e ka akuzuar drejtpërdrejt kryeprokurorin Lumezi, se është i lidhur me politikanë ë rëndësishëm të Kosovës, duke e përfshirë këtu kryetarin e Kuvendit, Kadri Veselin dhe Ministrin e Inovacionit dhe Ndërmarrësisë, Besim Beqaj.

Ish-prokurori Blakaj, ka thënë se Lumezi kishte kërkuar që ndaj Besim Beqajt të mos ngrihej aktakuzë, në rastin e njohur si Afera “Pronto”. Kurse, sa i përket Kadri Veselit, ish-prokurori Blakaj ka thënë se ishte qortuar nga Aleksandër Lumezi, për marrjen në pyetje të kryetarit të PDK-së, Kadri Veseli.