Deputetja Vjosa Osmani ka ftuar protestë masive më datën 7 të muajit të ardhshëm. Thotë se vetëm kështu i dëshmohet presidentit Hashim Thaçi se Kosova është e pandashme.

Nëpërmjet një shkrimi në Facebook deputetja e LDK’së thotë se përkrah rezolutën kundër korrigjimit të kufijve, por se kjo nuk mjafton për Thaçin.

“Rezoluta e Kuvendit të Kosovës do të jetë e rëndësishme, por me gjasë e pamjaftueshme, për të ndalur aventurat e rrezikshme të Thaçit në dëm të sovranitetit të vendit. Thaçi mbanë titullin e kampionit për shkelje të Rezolutave të Kuvendit”, shkruan Osmani në Facebook.

“Prandaj, më 7 shtator, kur Thaçi udhëton për Bruksel për të bërë edhe një hap tutje drejt ndarjes së Kosovës, ne qytetarët e Kosovës, do të duhej të protestonim paqësisht, por masovikisht, për t’i dëshmuar atij dhe kujtdo tjetër që Kosova është një dhe e pandashme’, shton ajo.

Partitë opozitare kanë kërkuar seancë të jashtëzakonshme para takimit të Presidentëve të Kosovës e të Serbisë në Bruksel.

Në këtë seancë të jashtëzakonshme partitë opozitare po kërkojnë të votohet një rezolutë, për siç kanë thënë ata të mbrohet integriteti territorial.

Rezoluta e tillë është përkrahur edhe nga kryeministri Ramush Haradinaj.