Gjejlane Rrahmani-Islami nga Komuna e Kaçanikut është raportuar e zhdukur nga familjarët e saj.

Një 34-vjeçare nga fshati Begrac i Komunës së Kaçanikut është zhdukur që nga data 21 tetor. Hera e fundit ku është parë nga disa banorë të fshatit ka qenë ky vendi këtu. Institucionet e sigurisë së Kosovës janë duke e kërkuar së bashku me familjarët dhe banorët e fshatit, por që deri tani nuk ka asnjë gjurmë për të.

Familjarët e Gjejlanes thonë se që në moshën 22-vjeçare, asaj i ishin shfaqur sëmundje mendore dhe se problemet familjare që kanë pasur kohëve të fundit, e kanë shqetësuar atë edhe më shumë.

Ndërkaq, Policia e Ferizajt, në bashkëpunim me KFOR-in, FSK-në dhe të gjitha njësitet e tjera emergjente, kanë marrë të gjitha masat dhe ende janë duke vazhduar kërkimet për të.

Bashkëshorti i Gjejlanes, Hysen Rrahmani, nuk gjendej në shtëpi, por për KTV-në vëllai i tij ka treguar se ai ishte personi i cili përkujdesej për ta.

Më tutje, ai shtoi se kohëve të fundit, gruas së vëllait i ishte përkeqësuar gjendja edhe më shumë.

Familja kërkon nga të gjithë qytetarët që mund ta dallojnë atë diku, t’i lajmërojnë ata ose policinë.