Flamurtari ka marrë një fitore të madhe te Besa e Pejës me rezultat të thellë 0-4.

Skuadra nga kryeqyteti kosovar vetëm pas dy minutave lojë ka gjetur golin e parë në këtë sfidë.

Ishte talenti Almir Ajzeraj që shënoi një gol spektakolar nga gjuajtja e lirë për 0-1.

Pas golit të shënuar nga mysafirët, futbollistët e Besës u hodhën në sulm për ta kërkuar barazimin.

Balaj i vendasve goditi bukur në minutën e 19-të por vetëm shtylla shpëtoi portierin Shehu.

Portieri i mysafirëve Shehu ishte vendimtar edhe në goditjet e Kasapit dhe Zhivkoviq duke shpëtuar skuadrën e tij në pjesën e parë që përfundoi 0-1.

Me të filluar pjesa e dytë mysafirët gjetën edhe golin e dytë me anë të Oscar Mendes që shënoi për 0-2.

Në minutën e 51-të, për Besën në moshën 43-vjeçare u rikthye në fushë edhe Haxhi Zeka.

Zeka kishte disa goditje në vazhdim të ndeshjes por që priti portieri Shehu.

Flamurtari arriti ta shënoj edhe golin e tretë në minutën e 77-të nëpërmjet Alban Shillovës.

E golin e fundit në këtë sfidë për Flamurtarin e shënoi talenti Almir Ajzeraj, gol që ishte i dyti personal për të në këtë sfidë.

Pas kësaj fitore Flamurtari zë pozitën e 10-të në tabelë me 22 pikë të tubuara, tri më shumë se Besa që ndodhet në pozitën e 11-të.

Në ndeshjen e ardhshme, Flamurtari do të përballet me Vllazninë e Pozhoranit në kryeqytet.

Ndërkohë Besa e Pejës do ta ketë një tjetër ndeshje të vështirë pasi do të luaj në udhëtim te kampioni aktual Trepça ’89.