Udhëheqësi suprem i Iranit u bëri thirrje kombeve myslimane të bashkohen kundër Shteteve të Bashkuara, duke thënë se Teherani kurrë nuk do të dorëzohet para “ngacmimeve”, raportoi televizioni shtetëror.

“Kombi iranian i ka rezistuar me sukses përpjekjeve të ngacmimit nga Amerika dhe fuqitë e tjera arrogante dhe ne do të vazhdojmë t’i rezistojmë … Të gjitha kombet myslimane duhet të qëndrojnë të bashkuara kundër Amerikës dhe armiqve të tjerë”, tha Ajatollah Ali Khamenei, transmeton portali arbresh.info.

Autoriteti i lartë i Iranit kritikoi Trump që tha se disa vende në Lindjen e Mesme “nuk do të zgjasin një javë” pa mbrojtjen e SHBA-ve.

“Vërejtje të tilla janë poshtërim për myslimanët … Fatkeqësisht, ka luftë në rajonin tonë midis vendeve myslimane. Qeveritë e prapambetura të disa vendeve myslimane po luftojnë me vendet e tjera”, tha Khamenei.

Irani dhe Arabia Saudite kanë qenë prej kohësh të mbyllura në një luftë rajonale, duke konkurruar për epërsinë rajonale nga Iraku në Siri dhe Liban deri në Jemen./Arbresh.info/