Këshilli i Sigurimit rrëzon rezolutën ruse për Sirinë

21:26 | 14 Prill 2018
Trina Galanxhi

Këshilli i Sigurimit i Kombeve të Bashkuara nuk ka miratuar draft-rezolutën e iniciuar nga Rusia ku dënohej “agresioni i SHBA-ve dhe aleatëve të saj kundër Republikës Arabe të Sirisë dhe shkeljen e ligjit ndërkombëtar”.

Pro rezolutës përveç Rusisë votuan edhe Kina e Bolivia. Tetë vende votuan kundër ndërsa katër abstenuan.

Që një rezolutë të kalojë nevojitën së paku nëntë vota pro dhe të mos ketë veto nga Rusia, Kina, ShBA-ja Britania, apo Franca.

Ambasadori i Sirisë në Organizatën e Kombeve të Bashkuara, Bashar al-Jaafari, ka thënë se aksioni ushtarak nuk do ta ndalë Sirinë në arritjen e qëllimeve të saj në mposhtjen e terrorizimit në Siri.

Jaafari gjithashtu ka prezantuar tri kopje të kartës së OKB-së duke theksuar pozicionin e organizatës në raport me ligjin ndërkombëtar duke u sugjeruar SHBA-së, Britanisë e Francës “ta rilexojnë”. Ai tha se “sulmi në Siri ishte sulm në tërë Këshillin e Sigurimit të OKB-së”.