Ministrja e Mjedisit dhe Planifikimit Hapësinor Albena Reshitaj, gjatë vizitës zyrtare në Washington u prit në takim nga drejtori i lartë i Bankës Botërore, Ede Jorge Ijjasz Vasquez.

Në takim ministrja Reshitaj falënderoi bankën botërore për përkrahjen e vazhdueshme që po i jep Kosovës, e ne veçanti ministrisë që ajo udhëheq.

Nga ana tjetër drejtori i lartë i bankës botërore ri konfirmoi përkrahjen për Kosovën për realizimin e projekteve që do të ndikojnë në përmirësimin e gjendjes së mjedisit dhe krijimin e një planifikimi të duhur hapësinor, thuhet në njoftimin ministror.

Gjatë kësaj vizite zyrtare ministrja Reshitaj po merr pjesë në konferencën “Qeverisja e tokës në një botë të ndërlidhur”, e cila është bërë një nga ngjarjet më të mëdha ndërkombëtare në qeverisjen e tokës, duke tërhequr më mijëra pjesëmarrës, qeveritarë, akademikë, shoqëri civile dhe përfaqësues të sektorit privat.

Në këtë konferencë ku në fokus është toka dhe varfëria, janë paraqitur hulumtimet dhe praktikat e fundit për diversitetin e reformave, ndërhyrjet dhe inovacionet në sektorin e tokës në mbarë botën.

Në vazhdën e vizitës së saj, ministrja Reshitaj do të këtë takime të veçanta edhe me përfaqësues të departamentit të shtetit amerikan, me përfaqësues të lartë të USAID-ti dhe të MCC-së, nga të cilët do të kërkojë përkrahje për projekte konkrete në fushën e mjedisit dhe zhvillimit të qëndrueshëm.