Aktivistët e Vetëvendosjes do të dalin para Gjykatës së Apelit.

Në seancën e sotme gjyqësore do të trajtohen ankesat ndaj vendimit  për aktivistët për sulmin në Kuvendin e Kosovës, shkruan arbresh.info.

Gjykata Themelore e Prishtinës në nëntor të vitit të kaluar shpalli aktgjykimin ndaj katër të dyshuarve për sulmin me mortajë dore ndaj ndërtesës së Kuvendit të Kosovës.

Ata janë shpallur fajtorë në akuzën për të cilën janë ngarkuar dhe janë dënuar me një total prej 21 vjet e 6 muaj burg.

Atdhe Arifi është dënuar me 6 vjet burg, Frashër Krasniqi me 8 vjet, Egzon Haliti me 5 vjet e gjysmë ndërsa Adea Batusha me 2 vjet burg.

Mbështetësit e të akuzuarve në sallë kanë protestuar në momentin kur gjykatësi i shpallte aktgjykimet dhe kjo ka bërë që ai të urdhërojë nxjerrjen nga salla të disa pjesëmarrësve.

Për këtë vendim ka reaguar Lëvizja Vetëvendosje duke e quajtur kryekëput vendim politik dhe të padrejtë .

Ata kanë vlerësuar që pa prova e pa fakte , aktivistët e tyre janë privuar nga liria që prej fundit të muajit gusht të vitit 2016./arbresh.info/