Ekipi i Gjakovës e ka fituar edicionin e shtatë me radhë të turneut “Kupa e Qyteteve” në futsall, që organizohet tradicionalisht nga Federata e Futbollit e Kosovës, gjegjësisht Komisioni për Futsall, në nderim të heronjve të kombit, Zahir Pajaziti, Hakif Zejnullahu e Edmond Hoxha.

Pas ndeshjeve gjysmëfinale, të cilat u zhvilluan ditë më parë në Junik dhe Podujevë, sonte, në Pallatin e Rinisë dhe Sportit në Prishtinë, në praninë e qindra shikuesve u zhvillua ndeshja finale ndërmjet Gjakovës dhe Skenderajt.

Pas një loje tejet interesante dhe me aksione atraktive, në fund fitores iu gëzua ekipi i Gjakovës, me rezultat 5:4.

Golat për gjakovarët i shënuan Arbër Dobroshi (3’), Ramadan Alaj (21’, 34’), Nexhip Selimi (23’) dhe Halim Selmanaj (27’), derisa për drenicasit golat i shënuan Florim Thaqi (8’), Erkan Seferi (14’), Blend Balaj (32’) dhe Fatmir Balaj (36’). Para ndeshjes futbollistët e Skenderajt bartën fanella me mbishkrimin ‘Forca Adnan’ në mbështetje të Adnan Hysenit, trajner i Besës, i cili vuan nga sëmundja dhe po shërohet jashtë vendit.

Në fund juria e turneut shpalli më të mirët: Lojtari më i mirë i turneut u shpall Halim Selmanaj, të cilit kupën ia dorëzoi përzgjedhësi i Kosovës në futsall, Ramadan Cimili. Portieri më i mirë u shpall Alfred Prençi, derisa trofeun ia dorëzoi Afrim Nebiu. Ndërkaq, trofeu i golashënuesit më të mirë i takoi Arbër Dobroshi, të cilën ia dorëzoi Agim Avdyli.

Medaljet për ekipet finaliste i ndanë kryetari i Komisionit të Futsallit, Rasim Gimolli dhe familjarët e heronjve Pajaziti, Zejnullahu e Hoxha, derisa kupën për vendin e dytë kapitenit të Skenderajt, Florim Thaçi ia dorëzoi Floretë Zejnullahu, mbesa e heroit Hakif Zejnullahut, derisa kupën e vendit të parë kapitenit të Gjakovës, Nexhip Selimi ia dorëzoi Bajram Pajaziti, i vëllai i heroit, Zahir Pajaziti.

Me medalje të këtij turneu u nderuan edhe delegati i ndeshjes, Hysni Gjinovci dhe gjyqtarët e ndeshjes finale Besar Beqiri e Besart Ismajli.

Ndërkohë, para ndeshjes finale u zhvillua ndeshja e veteranëve ndërmjet Llapit dhe Dukagjinit, të cilën e fituan veteranët e Llapit, me rezultat 4:2.